O le Susuga Rev Alesana Afamasaga o le Faafeagaiga a le EFKS Lefagaoalii Savaii sa ia taitaia i se sauniga lotu puupuu e amataina ai lenei faamoemoe.
Na sosoo lea ma le lauga autū o le Aso sa saunoa iai le Afioga i le tamaitai Minisita o le Matagaluega o Fesootaiga, Faamatalaga ma Fesootaiga Vavave Faaneionapo Safuneituuga Paaga Neri e faatatau lava I le auga ma le faamoemoe o le Matagaluega.
Na mae’a le lauga mai le Afioga I le Minisita ona sosoo ai lea ma le faailoaina o le saunoaga autu mai le Failautusi Aoao o le Faalapotopotoga a Fesootaiga a le Lalolagi (ITU).
O le manatu taua sa faailoa mai I lenei feau o le faatauaina lea “O le Puipuia o fanau mai Fesootaiga le Talafeagai mai luga o Fesootaiga vavave Faaneionapo” Protecting Children in Cyberspace”
O lenei feau ua faamamafaina mai ai le faatau’a o le vaaia ma le puipuia mai oa tatou alo ma fanau mai fesootaiga lē talafeagai e ala mai i nei Fesootaiga. Ua fai si saoasaoa tele o le iloa e o tatou alo ma fanau o le faaaogaina o nei ituaiga fesootaiga, ma e ona lamatia ai lo latou olaga talavou ma le latou ola aoaoina lelei pe afai e tuusaunoaina i latou e faaaogaina nei ituaiga o fesootaiga. Peitai o nei faafitauli uma ua nofo tapena iai le Matagaluega o Fesootaiga, Faamatalaga ma Fesootaiga Vavave Faaneionapo e ala i le tapenaina o Faiga Faavae maumautūtū ina ia faamalosia ai le puipuiina o fanau mai ituaiga fesootaiga lē talafeagai e ono osofai’a ai lo latou olaga aoaoina lelei. O lenei feau ua avea lea o se fafagu mo tatou uma aemaise ia avea lea o se faamalosi mo a tatou fanau ina ia faaeteete I le soona faaaogaina o fesootaiga lē talafeagai.
Ua tapena nei le Matagaluega o Fesootaiga, Faamatalaga ma Fesootaiga Vavave Faaneionapo mo le fausia o se Faiga Faavae ma se Tulafono e puipuia ai mai nei ituaiga faafitauli mo le lumanai. O le puipuia o fanau mai nei faafitauli o le matafaioi lea faamatua e le tatau ona faatamala pe tuu saunoaina i soo se taimi.
Ae mo Samoa lava ia ua faamanatuina faatasi lenei aso ma le faailoaina lea o ni matatia tetele ua ausia talu ona faafeagai le Matagaluega ma le atinaeina mai o le itu lava tau fesootaiga mai nai tausaga ua tuanai.
O nisi nei o matatia ua ausia
- Tulafono Fesootaiga 2005
- Faatuina o le Ofisa o le Regulator
- Toe iloiloina o le ICT Strategies 2005-2009
- Fausiaina o Fesootai Centres
- Faateleina le aofaiga o Fesootaiga Faainitaneti i Apia ma nuu i tua
- Faatauvaga ma Telefoni Feaveai Mobile Competition (2 mobile providers)
- International Gateway Liberalisation
- Fausia o le laina e faatele ina ai Fesootaiga mai lalo o le manava o le sami.
O nei atinae uma ua atili faamalosia ai le taua ma le tatau ona faamanatuina o Ala o Fesootaiga pei ona iai le asō. O Samoa o le atunuu muamua lea o le Pasefika ua mafai ona fesootai vavalalata atu i le atu Asia, Europa, Aferika ma Amerika i luga o nei fesootaiga.
Na mae’a lea soso’o ai lea ma le faamalositino ona faagasolo ai lea o debate sa tofiaina iai aoga pei o Robert Louis Stevenson College, St Mary’s College, Pesega College ma le SDA College.
E maoa’e le tulaga na oo iai ia fefinauaiga mai Aoga taitasi na lautogia i le maualuga ua oo iai le silafia e tamaiti o le faaaogaina o Fesootaiga Vavave Faaneionapo. Sa maitauina le finau o Aoga uma sa auai mo le faamoemoe o le Matagaluega, ma na mae’a lea ona faagasolo ai lea o le laugatogi ma tufatufa ina ai faailoga sa saunia e Kamupani sa auai pei o CSL, Lesa’s Telephone Services, Digicel ma le Samoa Tel.
O se tulaga faafiafia ina sa iai le Matagaluega i le maualuga o lea aso sa taupo ina aua le faamanatuina o le aso mo Fesootaiga a le Lalolagi (World Telecommunication and Information Society Day)
O le susuga a Tuloa Fetufou Aiono o le Pule Lagolago a le Matagaluega sa ia saunoa i le saunoga mulimuli e faafetaia ai e sa auai mai aemaise Aoga sa lautogia mo le faamoemoe o le Matagaluega ua iu ma le manuia.
O lenei faamoemoe o le a faamanatuina pea i tausaga uma.